Ish-kryebashkiaku i New Yorkut, miliarderi Michael Bloomberg, u tërhoq nga gara për president të Shteteve të Bashkuara, pas rezultateve të dobëta që mori në të ashtuquajturën “Super e Marta”.
“Tre muaj më parë, unë i jam bashkuar garës për president për të mposhtur Donald Trumpin. Sot, po e lë këtë garë për të njëjtën arsye”, tha Bloomberg.
“Unë gjithmonë kam besuar se mposhtja e Donald Trumpit nis me bashkimin me kandidatin që ka shanset më të mira. Pas votimeve të djeshme, është e qartë se ai kandidat është miku im dhe një amerikan i madh, Joe Biden”, shtoi Bloomberg.
Ish qytetari i parë i New Yorkut u promovua nga performanca e tij si kryebashkiak dhe më pas me premtimin për të rindërtuar vendin dhe për të rikthyer besimin tek ëndrra amerikane, ku të pasurit do të paguajnë më shumë dhe klasa e mesme do të mbajë peshën që i takon.
Ai e ka konsideruar më herët veten si demokrati i vetëm që mund të nxjerrë presidentin republikan nga Shtëpia e Bardhë. Megjithatë, edhe pse shpenzoi më shumë se gjysmë miliardë dollarë në fushatën e tij, ai nuk fitoi asnjë shtet të vetëm në zgjedhjet e “Super të Martës” .
Michael Bloomberg është personi i tetë më i pasur në Shtetet e Bashkuara të Amerikës dhe i njëmbëdhjeti në botë, me një pasuri që për vitin 2019 llogaritet rreth 55,5 miliardë dollarë./Opinion.al
