Gazetari dhe publicisti Alfred Lela ka bërë të ditur përmes një statusi në rrjetin e tij social “Facebook’ se nuk do të jetë më drejtor i “Media Mapo”. Lela tha se i ka përfunduar kontrata me 31 dhjetor.
Sipas tij, shtatë vitet e kaluara te “Mapo” kanë qenë të papërsëritshme.
Ja statusi i plotë i Lelës:
Nuk jam me drejtor i Media Mapo. Jo sepse kam sulmuar Erion Veliajn, siç shkruan syrit.net, por sepse unë kam patur një kontratë deri më dt 31 dhjetor. E cila mund të rinovohej ose jo pas kësaj date.
Botuesi Henri Cili me dha tre opsione, i treti i të cilëve ishte puna si pedagog i Komunikimit në UET. Dy të tjerat parashikonin një linjë editoriale që përputhej me shpalljen e Henrit në një shkrim të para ca kohëve “një mandat të dytë për Ramën reformator”.
Unë kam patur dhe kam kritikat e mia për opoziten e Bashës, por profesionalisht dhe as personalisht, nuk mund të shtyhesha drejt një qëndrimi të tillë, i cili shuante një pjesë të madhe të qëndrimeve të mia publike. Nuk kam bërë asnjë heroizëm duke zgjedhur të drejtën e qëndrimeve të mia të lira dhe pranimin e një rroge si pedagog, që është sa një e pesta e asaj si drejtor i Mapo.
Kam punuar te Mapo që nga numri 0 i saj dhe ndihem i lirë dhe i hapur për të thënë se ka qenë e mbetet edhe projekti im. Pavarësisht ngecjeve dhe shtyrjeve, rreth 7 vitet qe kam kaluar me kolegët e Mapo dhe botuesin Cili, mbeten të papërsëritshme. Ky rrugëtim në të shkuarën nuk duhet të na pengojë, për motivime të së tashmes, të çojmë në dreq të mirën bashkë me të ligën, dhe ta projektojmë të ardhmen si pusi te njeri-tjetrit.
Gjej rast në këtë status të përshëndes kolegun Armand Shkullaku dhe të përsëris atë që i thashë në ëhatsupp: më e pakta që mund të thuhet, ke bërë një televizion joprovincial! Përshëndetje dhe falënderime të gjithë atyre që më kanë lexuar te Mapo, dhe që do vazhdojnë ta bëjnë këtë shenjë nderimi ndaj meje dhe tekstit të shkruar, aty apo tjetërkund në të ardhmen.
