Igli Tare dhe Zhorg Mendesh: së shpejti mund të jenë partnerë për biznes. Sipas të përditshmes italiane “Corriere dello Sport”, në fakt, “mbreti” i menaxherëve të futbollit i ka kërkuar drejtorit sportiv të Lacios një akord, sipas të cilit çdo ofertë e drejtuar një lojtari të klubit bardhekaltër do kalojë fillimisht përmes agjencisë së portugezit.
Vetëm disa ditë më parë, Mendesh u ofrua si ndërmjetës për kalimin e “xhevahirit” të bardhekaltërve, Sergei Milinkoviç-Saviç, te PSG pas një oferte prej 170 milionë eurosh. Një plusvalencë stratosferike duke konsideruar se transferimi i serbit në kryeqytetin italian kushtoi vetëm 15 milionë euro në total (kur u mor nga Genku).
