Kreu i PD, Sali Berisha, ka komentuar deklaratat e kreut të PDIU-së, Shpëtim Idrizi, i cili bëri thirrje që mos të votohet kandidati i opozitës për bashkinë e Himarës, Fredi Bejleri.
Berisha në një dalje për mediat tha se deklarata të tilla janë të panevojshme dhe se i shërbejnë kundërshtarëve.
“Nuk kam asnjë lloj komenti. Secili merr vendimet e tij. Kjo thirrje, nëse e ka bërë, shkon në favor të kundërshtarëve tanë. Ka bërë një gabim për mendimin tim të panevojshëm.”, tha ai.
Ndërkaq, Idrizi në një intervistë për abc news është shprehur se shqiptarët nuk duhet të votojnë një njeri që del edhe bën fushatë me flamurin e Vorio Epirit dhe që ka qëllime antishqiptare.
“Himara nuk është zonë minoritare edhe këtë e ka thënë edhe Berisha para pak kohësh dhe nuk ka asnjë punë që në një bashki shqiptare të vendosësh një kandidat të minoritetit. Është e palogjishme që në një bashki jo minoritare të vendosësh një kandidat të minoritetit.
Akoma lë më shumë për të dëshiruar që kandidati të jetë Fredi Bejleri i cili është një person i njohur për rekorde dhe qëndrime antishqiptare. Ai është i dënuar nga Athina për masakrën e Peshkëpisë, është dënuar nga Gjykata e Vlorës për dhunim të simboleve kombëtare dhe bën fushatë duke pasur flamurin e Vorio Epirit.”, tha ai./Opinion.al
