Detaje të reja janë zbardhur në lidhje me ngjarjen e ndodhur ditën e djeshme, ku policia ndoqi një makinë tip “Audi Q8” që nuk iu bind urdhrit për të ndaluar dhe gjatë ndjekjes përplasi tre makina.
Pas arrestimit të pasagjerit Skerdi Sina, autoritetet kanë identifikuar edhe drejtuesin e makinës. Ai është Joni Sadikaj, 26 vjeç.
Ashtu si Skerdi Sina, edhe Sadikaj ishte shpallur në kërkim në muajin janar për ngjarjen në zonën e Astirit në Tiranë, ku me 5 persona të tjerë mbyllën në një apartament të marrë me qira, një vajzë 21-vjeçare, pasi kishin pirë gjithë natën lëndë narkotike dhe alkool.
Joni Sadikaj dyshohet se në atë kohë nuk kishte shumë ditë që ishte njohur me vajzën në një prej lokaleve më të njohur të Astirit, ku ajo punonte.
Ditën e djeshme Sadikaj mundi t’u largohej policisë me vrap dhe deri më tani nuk është lokalizuar. Ndërkohë, Policia njoftoi ditën e djeshme se personat që ndodheshin në “Audi Q8” ishin të armatosur.
Skerdi Sinës, përveç një krëhër arme tip Glock, me fishekë, iu gjet edhe një patentë me foton e tij, por me identitet dhe të dhëna të rreme. Kjo leje drejtimi, ishte me identitetin Almo Aliaj dhe dyshohet të jetë e falsifikuar.
Në momentin që është larguar në këmbë me vrap, hodhi armën, që u gjet më pas nga policia. Ndërsa nga kontrolli kur dy të rinjtë braktisën makinën “Audi Q8”, u gjet një sasi e vogël kanabisi dhe disa celularë, që do të ekzaminohen.
Skerdi Sina
Joni Sadikaj
