Gjykata e Shkallës Parë në Dibër ka dhënë ditën e sotme masën e sigurisë “Arrest me Burg” për Alfred Debreshin, i cili i vuri tritol në makinë vëllait të tij minatorit dhe ish kandidat për deputet Elton Debreshi.
Bëhet me dije se ka prova dhe përgjime ambientale që ngrejnë dyshime se ngjarja është inskenuar nga të dy vëllezërit me qëllim që ta përdornin atë për të kërkuar azil jashtë shtetit.
Nga përgjimet rezultoi se Alfred Debreshi, është person i implikuar drejtpërdrejt në këtë ngjarje, pasi në bisedat e tij, ai disa herë i drejtohet vëllait të tij, Eltonit, me fjalët “më fute në burg”. Po kështu gjatë bisedave ambientale të përgjuara, vëllezërit Debreshi flasin për mënyrën se si ato e kanë deklaruar ngjarjen përpara policisë dhe janë shumë të shqetësuar pasi deklarimet e Alfredit nuk përputhen me të Eltonit.
Debreshi ka kandiduar në zgjedhjet e 25 prillit si deputet i pavarur në Dibër edhe pse nuk arriti të marrë votat për të siguruar mandatin.
Alfred Debreshi akuzohet për “shkatërrim të pronës me eksploziv” dhe “mbajtje pa leje të armëve shpërthyese”./Opinion.al
