Sherri për një karikues telefoni i mori jetën Marvi Mihalit, djalit të vetëm të atletit rekordmen Pavllo Mihali dhe mësues së Liceut Artistik Mira Mihali. Në një intervistë për gazetën “Shekulli”, Pavllo Mihali, i ati i viktimës rrëfen të vërteten e sherrit. Sipas tij, djali u sulmua nga grupet e gangsterëve, duke i çarë aortën.
Ai thotë se Marvi ishte vetë i dytë në atë sherr dhe nuk ka mundur të shpëtojë nga thika e sulmuesve, që sipas tij ishin të shumtë, 10-15 vetë. Pavllo Mihali thotë se djali i tij i vetëm 22 vjeç, nuk kishte asnjë njohje me sulmuesit.
“E vërteta është sipas organeve të policisë. Për Marvin shkruajnë shokët e vet të shkollës, si djalë model dhe shembullor. Grupet e gangsterëve i ranë me thikë duke i çarë aortën, ata ishin 10-15 veta, kurse djali im ishte vetë i dytë. Marvi nuk i njihte. Një shok i Marvit ia kishte shitur vagabondëve celularin. Shoku thërret Marvin nga lokali. Marvi nuk u përfshi në sherr, 3 grupet erdhën dhe i sulmuan këta të dy. Marvit ja ngulën thikën!”, rrëfen ai.
22-vjeçari u dërgua menjëherë në Spitalin e Traumës, por fatkeqësisht ai nuk mundi t’i përballonte dot plagët e marra.
Policia ka arrestuar autorin e vrasjes Eugen Bitraj 24 vjeç dhe tre bashkëpunëtorët e tij: Dejvi Bitraj 19 vjeç, Kridens Alla,19 vjeç dhe Marsel Alla, 23 vjeç. Ngjarja ndodhi mbrëmjen e së hënës pranë stadiumit Selman Stermasi, në rrugën “Gjin Bue Shpata” në kryeqytet. /Opinion.al
*Në foto, babë e bir
