Kryeministri i Kanadasë, Justin Trudeau, ka rezultuar pozitiv me Covid-19. Lajmin e bëri të ditur ai vetë ditën e sotme, ndërsa shteti i tij vazhdon të përballet me një rritje të rasteve për shkak të variantit Omicron.
“Këtë mëngjes, unë dola pozitiv me Covid-19“,-shkroi në Twitter Trudeau, i cili është plotësisht i vaksinuar.
“Unë ndihem mirë dhe do të vazhdoj të punoj në distancë këtë javë duke ndjekur udhëzimet e shëndetit publik. Të gjithë, ju lutemi vaksinohuni dhe përforcohuni“,-shton ai.
Trudeau dhe familja e tij kanë qenë të izoluar prej ditësh pasi njoftuan një ekspozim ndaj Covid-19. Të paktën një nga tre fëmijët e tij të moshës shkollore gjithashtu ka rezultuar pozitiv, sipas zyrës së kryeministrit. Trudeau nuk bëri të ditur se si u ekspozua.
Ai u takua personalisht të mërkurën me disa anëtarë të kabinetit të tij.
Familja Trudeau është zhvendosur në një vend të pazbuluar si një masë paraprake, ndërsa protestat vazhdojnë në Otava nga ata që kundërshtojnë kufizimet anti-Covid-19.
Kanadaja ka një nga normat më të larta të vaksinimit në botë, me rreth 4 në çdo 5 kanadezë janë vaksinuar plotësisht./Opinion.al
