Detaje të reja janë zbardhur nga ngjarja e rëndë e ndodhur këtë të dielë në Kavajë.
Bëhet me dije se Arian Gosa, i cili u vra pasditen e kësaj të diele, ishte duke pirë kafe me të atin në një lokal, kur një person ende i pa identifikuar e ka qëlluar me një plumb pistolete në kokë.
Sipas burimeve, autori është larguar më pas në këmbë. Aktualisht po vëzhgohen kamerat e sigurisë për të parë nëse mund të identifikohet si dhe të zbulohet drejtimi në të cilin është larguar.
Uniformat blu dyshojnë që ngjarja të këtë ndodhur për motive hakmarrjeje.
“Më datë 21.05.2023, rreth orës 18.30, në lagjen Nr. 1, në Kavajë, në një lokal, një person ende i paidentifikuar ka vrarë me armë zjarri pistoletë shtetasin A. G.
Shërbimet e Policisë pas marrjes së njoftimit kanë shkuar menjëherë në vendngjarje, kanë rrethuar zonën, kanë ngritur pika kontrolli dhe vijon krehja e zonës për të bërë të mundur kapjen e autorit.
Grupi hetimor nën drejtimin e Prokurorisë ndodhet në vendngjarje dhe vijon veprimet hetimore për sekuestrimin e provave me qëllim identifikimin dhe kapjen e autorit.
Paraprakisht nga të dhënat e grumbulluara dyshohet se ngjarja ka ndodhur për motive hakmarrje”, tha policia./Opinion.al
