Gjatë ditës së sotme në zonën e Liqenit të Thatë u ndalua një 38-vjeçar nga policia me drogë dhe armë pa leje.
Sipas policisë bëhet fjalë për Bledi Haka, i konsideruar një person me rrezikshmëri të lartë. Përveç drogës, armëve dhe një sasie të madhe parash policia i sekuestroi edhe një bllokues valësh celularësh, një pajisje e avancuar për grupet kriminale.
Policia ka hedhur dyshime se Haka i trembej një atentati me eksploziv, për këtë arsye mbante një bllokues valësh të celularëve.
Cili është i ndaluari Bledi Haka?
Në vitin 2012 për shkak të një konflikti në një lokal ai ka përfunduar i plagosur.
Asokohe ngjarja ka ndodhur në zonën e Porcelanit, ndërkohë që një person qëlloi me armë zjarri drejt Bledi Hakës dhe dy personave te tjerë që po rrinin jashtë një lokali në këtë lagje të Tiranës.
Tre personat që ndodheshin në tavolinë, dyshohet se kanë pasur një konflikt me pronarin e lokalit, shtetasin me iniciale Sh.Sh, 47 vjeç.
Ky i fundit besohet se u ka treguar të afërmve për konfliktin që kishte me tre personat që ishin ulur në lokalin e tij dhe, për pasojë, nipi i pronarit, shtetasi Endrit Daci, ka shkuar në vendin e ngjarjes me një kallashnikov.
Ai ka shtënë me armë, duke plagosur sipas gjykatës, shtetasin Bledi Haka dhe Dritan Qello. I lënduar lehtë ka mbetur edhe vetë pronari i lokalit, i cili ka marrë ndihmë mjekësore ne spital./Opinion.al/
