Detaje të reja kanë dalë nga ngjarja e ndodhur mbrëmjen e djeshme në Shkodër, ku një 25-vjeçar i shpëtoi një atentati.
Mësohet se në drejtim të automjetit të 25-vjeçarit është qëlluar me 19 plumba teksa vetë ai ndodhej në mjet. Raportohet se fatmirësisht asnjë prej plumbave nuk e ka kapur të riun, i cili shpëtoi kështu pa u plagosur.
Menjëherë pas ngjarjes Alban Bruçi ka shkuar në policinë e Shkodrës për të bërë një kallzim penal lidhur me ngjarjen e ndodhur.
Bruçi ka deklaruar në polici se ai nuk e ka idenë se kush e ka qëlluar dhe se nuk ka konflikte me persona të tjerë ndërsa atentati ndodhi pak metra larg banesës së tij. “Nuk e kam idenë se kush mund të jenë autorët e kësaj ngjarje. Kam qenë duke shkuar në shtëpi kur dy persona me motoçikletë u afruan dhe qëlluan ndaj meje. Në atë moment u mundova që të shpëtoj dhe eca pak metra me makinë. Pasi u larguan nuk kisha marrë asnjë plumb dhe menjëherë erdha në polici për të treguar ngjarjen. Nuk kam konflikte me persona të tjerë dhe nuk e di se kush mund ta ketë bërë”, mësohet të ketë thënë Bruçi.
Mësohet se Alban Bruçi ka qenë në ecje e sipër me automjetin tip “Audi” kur papritur dy persona me motoçikletë janë afruar dhe kanë qëlluar në drejtim të tij në ecje e sipër me 19 plumba.
Policia e Shkodrës mendon se 25 vjeçari është qëlluar me armë zjarri pistoletë tip Scorpions e cila dyshohet se ka qenë me silenciator pasi nuk janë dëgjuar të shtënat në zonën ku ndodhi atentati. Disa prej plumbave kanë përfunduar në xhamin dhe në derën e makinës por i riu ka arritur të shpëtojë.
Automjeti i tij edhe pasi është qëlluar ka ecur disa metra dhe më pas është ndalur ndërsa atentatorët janë larguar.
Efektivët dhe prokuroria vijojnë punën për sqarimin e plotë të rrethanave dhe kapjen e autorëve. Deri më tani policia nuk ka arritur që të identifikojë autorët ndërsa janë sekuestruar kamerat e sigurisë të subjekteve aty afër për të zbuluar se çfarë ka ndodhur.
Alban Bruçi nuk është një emër i panjohur për policinë. Në vitin 2016 ka plagosur një person afër teatrit “Migjeni” dhe asokohe është arrestuar si i dyshuar për veprën penale “vrasje e mbetur në tentativë”.
