Ish-drejtori i burgut të Lushnjës, Judmir Shurdhi është vendosur në prangat e policies pas akuzave për shpërdorim detyre dhe shkelje të barazisë në tendera.
I dënuar në qershor 2022 me 1 vit e katër muaj burg nga Gjykata Kundër Krimit dhe Korrupsionit të Organizuar, ish-drejtori i burgut “Kosova” të Lushnjës akuzohet se bashkë me vartësit e tij shkelën procedurat për tenderin e përcaktuar për transportin e gardianëve të burgut.
Sipas SPAK Shurdhi ka ngarkuar të njëjtët persona të jenë në cilësinë e anëtarit të Njësisë së prokurimit dhe Komisionit të vlerësimit të ofertave, ndërsa gjithashtu akuzohet se kishte ushtruar presion për kualifikimin e një operatori që mori pjesë në garë. “Specialistët për Hetimin e Krimeve të Komisariatit të Policisë Lushnjë, në vijim të punës për kapjen e shtetasve në kërkim dhe vënien e tyre përpara përgjegjësisë penale, finalizuan operacionin policor të koduar “Takimi i fundit”, si rezultat i të cilit u bë kapja dhe ndalimi i shtetasit Judmir Shurdhi, 43 vjeç, banues në Lushnjë. Gjykata e Posaçme e Shkallës së Parë kundër Korrupsionit dhe Krimit të Organizuar, Tiranë, me vendimin e datës 07.12.2022, e ka dënuar këtë shtetas, me 1 vit e 4 muaj burgim, për veprën penale “Shkelja e barazisë së pjesëmarrjes në tendera apo ankande publike”, kryer në bashkëpunim. Ky shtetas, në periudhën 2020-2021, gjatë së cilës ka qenë drejtor në burgun e Kosovës, Lushnjë, në bashkëpunim me shtetas të tjerë, ka kryer veprime që përbëjnë shkelje të barazisë së pjesëmarrjes në tendera apo ankande publike”, thuhet në njoftimin zyrtar./Opinion.al
