Abdelhak Nouri mesfushori i Ajax-it është jashtë rrezikut për jetën, por në gjendje kome të induktuar dhe nën kontrollin e vazhdueshëm të mjekëve. Klubi i Ajax-it bën me dije se Nouri kishte pësuar një “aritmi kardiake”. Lojtari 20-vjeçar humbi ndjenjat gjatë pjesë së dytë të ndeshjes miqësore ndaj Werder Bremen-it të shtunën në Austri. Dy ambulanca mbërritën për t’i dhënë ndihmën e parë lojtarit në fushë përpara se ai të dërgohej në spital me helikopter. Trajneri i Ajax-it Marcel Keizer tha se ai dhe klubi tashmë mundet vetëm “të shpresojnë dhe të luten” që Abdelhak Nouri të dalë nga kjo situatë. “Nuk jam mjek ndaj nuk mund të them asgjë rreth kësaj. Na mbetet të shpresojmë dhe të lutemi që ai ta kalojë. Është e pamundur të përshkruaj se çfarë ka ndodhur. Appie është pjesë e Ajax-it. Ai është Ajax-i i vërtetë: vjen nga sistemi i të rinjve, të gjithë e njohin. Ajo që ndodhi ishte tronditëse”.
