Një kamarier me origjinë shqiptare, që i preu kokën shefit të tij me thikë djathi, ka vendosur të apelojë burgimin e përjetshëm. Jonathan Limani e vrau Christopher Varian në Oxfordshire Golf Club në Thame, në Gusht të 2010-s, disa javë pasi kishte mbërritur në Britani.
Limani, një shqiptar me pasaportë suedeze, i preu kokën shefit në kohën kur ky i fundit po pinte një cigare. Në deklaratën e dhënë para autoriteteve ai tha se kreu krimin e rëndë sepse “e detyroi Zoti”.
Gjykatësi Anthony King e dënoi atë me burgim të përjetshëm në 2012-n. Fillimisht ai u izolua në spitalin psikiatrik të sigurisë së lartë Broadmoor, por më pas u rikthye në Suedi.
Mediat e huaja raportojnë se gjykatësi ka refuzuar kërkesën e 44-vjeçarit për ta konvertuar dënimin me burgim të përjetshëm në një dënim me vite të caktuara burgu.
Norrtälje Tidning raporton se një bord mjekësh thanë se Limani përbën rrezik për shoqërinë, pavarësisht se mësohet të ketë shfaqur pendesë për krimin makabër.
Në kohën kur u shpall fajtor, mjeku psikiatër Michael Alcock tha se ai vuante nga skizofrenia paranojake dhe se ishte një individ tejet i rrezikshëm. Mjeku i tha në atë kohë gjykatës në Oxford se Limani besonte që Varian kishte bërë pakt me djallin që t’i bënin atij keq.
“Ai dëgjonte zëra nga Zoti (që e thërriste) për të parandaluar këtë konspiracion dhe kur të vinte momenti ta vriste shefin e tij në mënyrën siç e bëri”, tha Alcock.
Ngjarja ndodhi rreth orës 03:00 të së shtunës së 21 Gushtit 2010. Varian po bënte një pushim të shkurtër pasi kishte mbikëqyrur një dasmë. Limani mori një thikë që përdorej për prerjen e djathit, dy kate poshtë zonës ku pihej duhan dhe i preu shefit të tij kokën. Prokurori Alan Blake tha se dëshmitarë iu lutën që të ndalonte, por Limani e çoi krimin deri në fund. Limani kishte dy kombësi, pasi kishte jetuar në Suedi që prej vitit 2002.
