Klodian Gradeci, ish-drejtor i Agjencisë Kombëtare të Burimeve Natyrore është liruar me detyrim paraqitje nga Gjykata e Tiranës.
Lajmi është bërë i ditur nga News24, teksa shton se Gradeci ishte në arrest shtëpie gjatë kësaj kohe, dhe ditën e sotme gjykata ka marrë masën e sigurisë për detyrim paraqitje.
Gradeci është i akuzuar si i përfshirë në një skeme mashtrimi, e cila dyshohet se ka shkaktuar një dëm financiar prej 1.5 milion dollarë. Ai u ndalua në Rinas kur sapo kthehej nga Turqia ku ishte larguar pak ditë para finalizimit të operacionit që u arrestuan disa zyrtarë të tjerë për të njëjtën skemë mashtrimi.
Gjykata e Shkallës së Parë Tiranë i ka caktuar fillimisht Gradecit, masën e sigurimit “Arrest në burg”, për veprën penale “Shpërdorimi i detyrës”.
Skema e mashtirmit:
Me qëllim plotësimin e detyrimeve për Programin Minimal të Punës apo investimeve të detyrueshme për këto puse nafte) dhe në kushtet kur këto investime nuk i ka kryer, kjo shoqëri ka paraqitur në AKBN tetë fatura të falsifikuara për shërbime që realisht nuk i ka përfituar nga kompania amerikane Black Sëan Energy Service. Falsiteti i këtyre faturave është konfirmuar nga autoritetet gjyqësore amerikane dhe vlera totale e tyre është 1 299 000 USD.
Punonjësit e AKBN të arrestuar pak ditë më parë (Denis Durrsi, Qani Hoxhaj, Rezarta Qose) bashkë me Klodian Gradecin kanë certifikuar në mënyrë të kundërligjshme punimet e pakryera të pasqyruara në këto fatura si punime të kryera.
Ndërsa punonjësit e administratës tatimore Arben Doda dhe Simon Arku) kanë përpiluar një raport kontrolli në kundërshtim me ligjin duke bërë të mundur kjo administratë të pësojë një dëm ekonomik prej 568 000 USD./Opinion.al
