Ish-Sekretari i Përgjithshëm i Partisë Demokratike, Arben Ristani është paraqitur mesditën e sotme në Prokurorinë e Tiranës, pas thirrjes së këtij institucioni për çështjen e kontratave të lobimit.
Ristani ka mbërritur në prokurori me vullnetin e tij dhe është marrë në pyetje nga prokurorët Gjergji Tako, Ervin Karanxha dhe Kol Hysenaj. I pandehur në këtë çështje është edhe vetë kreu i PD-së, Lulzim Basha, si dhe ekonomisti i kësaj partie, Ilir Dervishi.
Një ditë më parë, Prokuroria e Tiranës dorëzoi në Polici kërkesën për shoqërimin e detyrueshëm të kreut të PD, Lulzim Basha, në datën 20 qershor. Kjo pasi Basha refuzoi t’i përgjigjej thirrjes për t’u paraqitur në Prokurori.
Çështja e pagesave për lobim të kryera nga ana e PD-së u hap në nëntorin e vitit 2017, kur firma lobuese amerikane ‘Muzin Capitol Partners’ plotësoi me informacione shtesë deklarimet e saj të detyruara me ligj për Departamentin e Drejtësisë. Sipas deklarimeve të kompanisë ‘Muzin’ ajo ka marrë tre pagesa, në një shumë prej 675 mijë dollarësh, për punën e saj në favor të Partisë Demokratike në vitin 2017: pagesa e parë mban datën 24 mars 2017 dhe është bërë nga firma ‘Biniatta Trade LP”, me një vlerë prej 150 mijë dollarësh, dy pagesat e tjera janë bërë nga Partia Demokratike, njëra më 27 mars, për 25 mijë dollarë, dhe tjetra më 9 qershor për 500 mijë dollarë.
Nga këto deklarime të firmës Muzin, vetëm ajo prej 25 mijë dollarësh, është pranuar nga kryetari i PD-së, të jetë paguar nga partia e tij./ Opinion.al
