Diplomati i lartë spanjoll Josep Borrell është propozuar të jetë në vend të Frederica Mogherinit, për të drejtuar kështu politikën e jashtme të BE-së.
I njohur për të mos dalë nga fjala e tij dhe për shpërthimet e çastit, 72-vjeçarin Borrell ka bërë përpjekje për të ringjallur reputacionin e Spanjës, pas një tentative të dështuar të shkëputjes së Katalonjës.
Ai ka qenë aktiv gjatë krizës në Venezuelë dhe nuk e ka fshehur kritikën e tij ndaj Presidentit të SHBA, Donald Trump.
Emërimi i tij, nëse miratohet nga Parlamenti Evropian, shënon një rilindje politike meteorike për njeriun i cili në vitin 1999 hoqi dorë nga kryesimi i Partisë Socialiste, pas një skandali financiar.
Nga ana tjetër, Christine Lagarde është propozuar të jetë presidentja e Bankës Qendrore Europiane. Pas nominimit ajo ka reaguar në një postim në rrjetin social Twitter.
“Jam e nderuar që jam propozuar për Presidencën e Bankës Qendrore Evropiane. Heq dorë përkohësisht nga përgjegjësitë si Drejtoreshë Menaxhuese e FMN-së gjatë periudhës së nominimit”,- shkruan Lagarde.
Më herët udhëheqësit e BE kanë zgjedhur ministren gjermane të mbrojtjes Ursuala Von Der Leyen për postin e lartë të shefit të Komisionit Evropian. Propozimi i zonjës Von der Leyen erdhi si një surprizë pasi emri i saj u refuzua fillimisht.
Von der Leyen është një aleate e ngushtë e kancelares Angela Merkel. Nëse miratohet edhe kjo kandidaturë nga Parlamenti Evropian ajo do të bëhet presidentja e parë femër e Komisionit. / Opinion.al
