Një ngjarje e rëndë kriminale u shënua mbrëmë afer mesnatës në fshatin Goriçaj të Divjakës. 42 vjeçari Judmir Stambolliu ishte ulur bashkë me 3 shokë në lokalin e fshatit, kur u qëllua për vdekje nga pronari. Mësohet se sherri ka ndodhur pasi viktima i kishte ngacmuar gruan Petrit Toromënit. Burrë e grua punonin bashkë në lokal dhe dyshohet se klienti ka ngacmuar me fjalë gruan e pronarit, mbase edhe nën efektin e alkoolit. Kaq ka mjaftuar që të shkrehet arma drejt tij.
Pronari i lokalit, që kishte banesën në katin e dytë të objektit ka marrë çiften, tip ‘karabinë’ e ka zbrazur në drejtim të 42-vjeçarit. Ky i fundit ndërroi jetë rrugës për në spital. Sapo u njoftuan për ngjarjen, forca të shumta policore mbërritën në vendin e krimit, ku priste edhe autori i dyshuar. Petrit Toromëni nuk bëri asnjë rezistencë, ndërsa tregoi se çfarë kishte ngjarë dhe më pas u shoqërua në polici.
Njoftimi i policisë së Lushnjes për ngjarjen
Në datën 11.12.2017, rreth orës 23:40 në Sallën Operative të Komisariatit të Policisë Divjakë ka ardhur një telefonatë se në fshatin Goriçaj ka ndodhur një vrasje. Menjëherë është nisur drejt vendit të ngjarjes grupi hetimor i cili ka konstatuar se: Në fshatin Goriçaj, Divjakë, në një lokal është qëlluar me armë gjahu shtetasi A.Ll, 42 vjeç, banues në Goriçaj, Divjakë, i cili ndërroi jetë rrugës për në spital.
Në kohë rekord policia e Divjakës zbardh ngjarjen dhe arreston në flagrancë autorin e dyshuar. Nga hetimet paraprake rezultoi se autori i dyshuar i kësaj ngjarje është shtetasi Petrit Toromëni, 42 vjeç, banues në fshatin Goriçaj, Divjakë, pronari i lokalit ku ka ndodhur vrasja. Dyshohet se vrasja ka ndodhur si pasojë e një konflikti të çastit për motive të dobëta. Policia po punon për zbardhjen e plotë të rrethanave dhe shkakut të ngjarjes.
/Opinion.al
*pamje nga vendi i krimit
