Një debat të madhe dhe përplasje ka shkaktuar ditën e sotme Institucioni i Akademisë së Shkencave. Pas letrës nga Akademiku Artan Fuga i cili i ngrite kryeministrit të vendit Edi Rama një sërë problematikash në këtë institucion, paraditen e sotme erdhi edhe reagimi i parë i Ramës. Ditën e sotme kur edhe në këtë institucion mbaheshin zgjedhjet për antarët e kryesisë Rama tha se: “Nëse nuk reformohet Akademia e Shkencave nuk do marrë më asnjë qindarkë nga buxheti e do të duhet të dorëzojë godinën! Prandaj-StopFarsës”.
Në Akademinë e Shkencave u zhvilluan sot të ashtuquajturat zgjedhjet farsë, ku kryetari konkurroi për nënkryetar dhe nënkryetari për kryetar, pa kundërshtarë. Menjëherë Kryeministri Rama reagoi duke i komunikuar këtij institucioni se fonde nga buxheti për Akademinë e Shkencave nuk do të ketë: “Meqë “Akademia” zgjodhi farsën uroj të gjejnë dhe fondet për vijimin e farsës!Fondet tona do t’i shkojnë universitetit për kërkim shkencor”, shkruajti Rama.
Por sa para është dhënë për këtë Institucion nga Buxheti i Shtetit?
Për vitin 2016 rezulton se ka marrë nga buxheti i shtetit 96 milionë lekë të reja për paga dhe investime. Siç dihet Akademia e Shkencave është institucion buxhetor dhe të ardhurat i siguron nga buxheti i shtetit, pjesëmarrja në projekte, gjithashtu të ardhura nga dhuratat, subvencionet e sponsorizimet. .
Nga të cilët 94 milionë janë shpenzime korrente, paga, dhe vetëm 2 mln lekë të reja investime. Akademia e Shkencave nuk ka marrë asnjë lek nga dhuratat, subvencionet apo sponsorizimet.
I vetmi mekanizëm financimi për të janë paratë e buxhetit të shtetit.
Kjo do të thotë se në rast ndërprerje të të ardhurave nga buxheti i shtetit, puna e Akademisë së Shkencave paralizohet. /Opinion.al
