Ministri i Diasporës Pandeli Majko tentoi që këtë të premte të bënte bashkë Edi Ramën dhe Lulzim Bashën në Samitin e Diasporës, por nuk ia arriti. Megjithatë, nga ana e kryeministrit nuk mungoi ftesa për dialog.
Pikërisht për këtë, Majko u është përgjigjur interesit të gazetarëve. “Unë mendoj që dialogu është gjithmonë gjëja më e mirë që mund të bëjë politika dhe shprehja “kur do flasim”, besoj ishte ftesë shumë e qartë”, është shprehur ai.
Ndërkohë për sa i përket rolit të Presidentit në këto negociata, Majko ka thënë se ndërmjetësimi është diçka normale, duke “e lënë topin” në anën e Kreut të Shtetit, i cili deri më tani përveç disa reagimeve mediatike, nuk ka mbajtur asnjë qëndrim zyrtar për zgjidhjen e krizës.
“Pse s’duhet të negociojë presidenti dhe pse e shtroni pyetjen sikur presidenti po bën një gjë të paprecedentë, të papritur dhe të pa dëgjuar? Është publiku që meriton një zgjidhje, sepse në kuptimin më të mirë dhe më të keq të fjalës u kemi nxirë jetën”, ka thënë Majko./Opinion.al
