Kreu i Partisë Demokratike, Lulzim Basha, thotë se pandëshkueshmëria në vendin tonë do të marr fund nëpërmjet vettingut të politikanëve.
Nga foltorja e Parlamentit, Basha kërkoi miratimin e vetingut, teksa tha se buxheti i vitit 2022 nuk reflekton nevojat e qytetarëve.
“Është korrupsioni që sfidon sistemin tonë të vlerave, që shkakton gjakderdhjen e financave publike, që pengon tregun e lirë, që vret konkurrencën, që ndal rritjen e rrogave dhe të pensioneve, që largon të rinjtë e të rejat, që bllokon përparimin në rrugën drejt BE-së, që ndihmon lulëzimin e trafiqeve dhe pasigurisë. Ndaj në një ditë si kjo, ku do të flitet gjatë për ekonominë, nuk mund të mos vendosim në qendër të agjendës, kryetemën tonë, kryetemën e shqiptarëve që duan fundin e pandëshkueshmërisë, vettingun e politikanëve. Sepse ekonomia e një vendi nuk mund të përparojë në një pellg korrupsioni, që frenon përpjekjet e shqiptarëve të ndershëm për një jetë më të mirë. Vendi ynë ka potenciale të jashtëzakonshme, ka burime natyrore të lakmueshme nga shtete më të pasura e të begata, ka njerëz të ndershëm që nuk kanë nevojë për shtetin, por kanë nevojë që shtetarët e korruptuar të mos bëhen pengesë me babëzinë e tyre”, tha Basha./Opinion.al
