Ish kryeministri Sali Berisha publikoi ditën e sotme, një denoncim në lidhje me spitalin e Peshkopisë. Sipas qytetarit dixhital, bashkëshorti i deputetes së Almira Zebi Xhembulla, mjek në këtë spital është përfshirë në një skandal.
Në denoncimin e bërë publik te Berisha thuhej se djali 20 vjeçar shkoi për të kontrolluar një puçërr në shpinë, por kirurgu Gazmir Xhembulla e ka bere operacion nga apandesiti.
I menjëhershëm ka qenë reagimi i vetë mjekut Gazmir Xhembulla, i cili në një status në Facebook shprehet tepër i indinjuar nga ngjarja.
Ai shkruan se ndaj pacientit janë zbatuar rigorozisht të gjitha rregullat dhe procedurat dhe se çdo sulm ndaj tij, ka të bëjë me punën e bashkëshortes.
Statusi i plotë
Si mjek kirurg, me një eksperiencë mbi 20-vjeçare, deklaroj nën përgjegjësine time të plotë, morale dhe profesionale, se ndaj pacientit E.S. janë zbatuar rigorozisht të gjitha rregullat dhe procedurat, sipas protokollollit mjekësor në fuqi.
Jam gati të mirëkuptoj shqetësimin e pacientit dhe familjarëve, por ndjej keqardhje të thellë kur shoh që një akuzë e pavend dhe aspak profesionale, është bërë sot nga një ish mjek dhe ish profesor i imi.
Që nga dita e parë e punës time si mjek, u kam shërbyer dhe u shërbej qytetarëve me profesionalizëm dhe devotshmëri, për këtë dëshmitarët më të mirë janë kolegët e nderuar dhe ata mijëra bashkëqytetarë të mitë.
Po kaq e padrejtë dhe dashakeqe është lidhja që i bëhet rastit në fjalë me punën e bashkëshortes time. Unë punoj përditë për ta luftuar sëmundjen, më vjen keq që dikush sot ka zgjedhur të bëjë politikë me të.
Në çdo rast, jam i hapur dhe u kërkoj strukturave përgjegjëse që të bëjne të gjitha verifikimet e nevojshme për t’i shkuar deri në fund të vërtetës.
