Policia vijon intesivisht këkrimet për 50-vjeçarin Gëzim Saraçi, personi që dyshohet se hodhi granatën në zyrën e kreut të bashkisë Lushnjë, Fatos Tushe. Sipas qelizave të telefonit, Saraçi, u lokalizua në qytetin e Beratit, 50 minuta pasi kishte kryer atentatin mëngjesin e 31 dhjetorit të 2019.
Dyshohet se 50-vjeçari është ndihmuar edhe nga personat të tjerë në Karbunarë të Lushnjës, duke ndërruar automjet dhe më pas ka vazhduar në drejtim të Beratit. Fatmirësisht, granata ofensive ka shpërthyer poshtë një tavoline, e cila ndodhet në paradhomën e kryetarit të bashkisë Tushe. Sipas ekspertëve anti-eskploziv, kjo ka qenë arsyeja e humbjes së fuqisë së granatës luftarake.
Ndërkohë burime nga spitali kanë deklaruar se është përmirësuar gjendja e Erisa Qalliut, sekretares se kryetarit të Bashkisë së Lushnjës, Fatos Tushe.
30-vjeçarja është ende nën kujdesin e mjekeve të spitalit të Traumës në kryeqytet. Ajo ka marrë lëndime në fytyrë dhe krahë. Një ditë më parë la spitalin kryebashkiaku Tushe, i cili qëndroi aty vetëm pak orë. Ai kishte marrë vetëm një plagë në gjoks ku ishte goditur nga një pjesë e granatës.
Hetimet pse ndodhi ngjarja
Sipas grupit hetimor, Saraçi e shantazhonte kreun e bashkisë së Lushnjës, Fatos Tushe me publikimin e disa materialeve komprometues, të cilat i dispononte prej më shumë se një viti. Njohja e 50-vjeçarit me kreun e Bashkisë së Lushnjës është e hershme. Fatos Tushe nuk ka bërë asnjë kallëzim penal në polici lidhur me shantazhet e vazhdueshme nga ish-shoferi i tij personal.
Dyshimet janë se Saraçi paracaktonte disa nga tenderët e qytetit të Lushnjës në drejtim të biznesmenëve. Ekspertët kanë zbardhur edhe pamjet e kamerave të sigurisë ku duket se si del nga zyra e kryebashkiakut, Gëzim Saraçi ka hedhur granatën dhe është larguar me shpejtësi./ Opinion.al
