Zbulohet e shkuara e pronarit te lokalit qe mbeti i plagosur pas granates qe hodhen ne biznesin e tij mengjesin e djeshem.
Ngjarja ndodhi në të gdhirë, teksa 32-vjeçari Albert Alterziu ka qenë i vetëm duke mbyllur lokalin.
Lokal që e ka në bashkëpronësi me vëllezërit e tij në një nga zonat më të populluara të qytetit.
Sipas Policisë, Alterziu ka qenë pranë derës së lokalit të tij kur një person i ka shkuar nga mbrapa dhe i ka hedhur te këmbët një granatë.
Autori është larguar me shpejtësi duke humbur gjurmët në errësirë, ndërsa shpërthimi i lëndës plasëse i ka shkaktuar plagë të rënda 32-vjeçarit.
Autori ka vepruar shpejt, duke mos i lënë kohë dhe mundësi shënjestrës të vetëmbrohet apo të shohë personin pasi ai ka rënë menjëherë në tokë si pasojë e shpërthimit të granatës.
Ka qenë një roje dyqanesh, ai që ka lajmëruar Policinë dhe të afërmit e të riut. I plagosuri është transportuar menjëherë në spital.
Mjekët thonë se gjendja e tij shëndetësore është e rëndë pasi shpërthimi i ka shkaktuar plagë në trup, por, falë ndërhyrjes së shpejtë, e ka kaluar rrezikun për jetën.
Policia është duke hetuar ngjarjen në pistën e një hakmarrjeje të mundshme.
Pasi i plagosuri ka pasur një të shkuar kriminale. Ai ka kryer dënim për një vrasje, ndërsa në vitin 2013 është plagosur me thikë.
Mësohet se në vitin 2001, kur ishte në moshën 15-vjeçare, pas një sherri, Alterziu ka qëlluar me thikë shtetasin Elton Shuli, duke e lënë të vdekur.
Viktima ishte shok me autorin dhe ngjarja nisi pas një sherri të çastit mes tyre. Për këtë ngjarje, Alterziu kreu dënimin nga 10 në 7 vjet burg për shkak të moshës së mitur.
Por shumë vite më pas (2013), ai u bë edhe një herë protagonist në një sherr mes së rinjsh me thika, ku mbeti i plagosur në këmbë.
Pas kësaj ngjarjeje, i riu nisi të punonte me vëllezërit e tij në një lokal që ka në pronësi familja dhe nuk ta të dhëna që të jetë përfshirë në ngjarje të tjera kriminale.
Por mëngjesin e së premtes, ndaj tij u hodh një granatë dore me qëllim eliminimin e tij në derën e biznesit të tij në lagjen “Partizani”.
Për shkak edhe të kaluarës së tij me shumë probleme, një nga pistat e hetimit të Policisë mbetet hakmarrja, por nuk përjashtohet as pista e ndonjë konflikti të mundshëm të kohëve të fundit të tij.
Familjarët e tij ende nuk kanë një dyshim se kush mund ta ketë kryer shpërthimin.
Sipas burimeve nga grupi i hetimit, familjarët kanë deklaruar se ndaj djalit të tyre nuk ka hakmarrje.
Pasi sipas tyre ai e ka kryer dënimin për krimin që kreu kur ishte në një moshë të mitur.
Policia dhe grupi hetimor kanë mbërritur në vendngjarje, duke bërë të mundur sekuestrimin e disa kamerave të sigurisë përreth vendit.
Blutë kanë shoqëruar dhe marrë në pyetje rreth 10 persona, por deri më tani nuk ka asnjë të arrestuar për ngjarjen.
Ata janë pyetur në cilësinë e personave që mund të kenë dijeni për ngjarjen, por, siç mësohet, dëshmia e asnjërit prej tyre nuk ka qenë ndihmëse për grupin e hetimit./ Panorama
