Qyteti i Nju Jorkut ka mbyllur të hënën shkollat, restorantet, baret dhe ambjente të tjera publike, në përpjekje për të ndaluar përhapjen e koronavirusit vdekjeprurës.
Kryetari i bashkisë Bill de Blasio tha se ai vendosi të veprojë sepse “qyteti po përballet me një kërcënim të paparë, dhe ne duhet t’i përgjigjemi me një mentalitet të kohës së luftës”.
Të dielën, Kryebashkiaku de Blasio tha se shkollat publike të qytetit do të mbyllen nga e hëna deri të paktën 20 Prill, në atë që ai e përshkroi si “vendim të dhimbshëm”.
Ai tha që zyrtarët do të rishikojnë mundësinë e rihapjes, por nuk përjashtoi që shkollat do të mbeten të mbyllura për pjesën tjetër të vitit akademik.
Gjithashtu, de Blasio njoftoi se nga e marta, restorantet, baret dhe kafenetë e qytetit do të kryejnë vetëm shërbimin e “marrjen e porosive dhe shpërndarjen e ushqimit në shtëpi”.
Qyteti i Nju Jorkut ka rreth 27,000 restorante, sipas departamentit të shëndetit të qytetit.
Kryebashkiaku de Blasio tha gjithashtu se “klubet e natës, kinematë, shtëpitë e vogla teatrale dhe vendet e koncerteve duhet të mbyllen të gjitha”.
SHBA ka konfirmuar 69 vdekje të lidhura me koronavirusin dhe 3,774 të prekur.
Qyteti i Nju Jorkut, ka popullsinë më shumë se tetë milion banorë dhe ka regjistruar pesë vdekje. Secila prej viktimave, nga 53 deri në 82 vjeç, kishte sëmundje shoqëruse sipas mjekëve.
Javën e kaluar mediat vendase cituan një zyrtar të lartë shëndetësor amerikan i pranoi se sistemi i testimit për koronavirusin në SHBA ishte duke dështuar. /Opinion.al
