Një ngjarje e rëndë është regjistruar pasditen e sotme në Mirditë. Eri Zefi, 34-vjeç, është gjetur i ekzekutuar në fshatin Zallë Xhuxhë të Fanit, vetëm disa kilometra larg qendrës së Rrëshenit.
Trupi viktimës është gjetur nga banorët e zonës të cilët kanë lajmëruar menjëherë policinë. Ai është gjetur në një kanal kullues, i mbuluar në gjak dhe me shenja plumbash në trup çka tregon se ka qenë viktimë e një ekzekutimi me armë zjarri.
Policia ndodhet në vendngjarje dhe ka rrethuar zonën. Ende nuk ka informacione se kur ka ndodhur vrasja dhe cilat janë shkaqet.
Burimet bëjnë me dije gjithashtu se viktima është me pasaportizim në Adriatik të Kurbinit, por që nuk jetonte atje.
Pika kontrolli janë ngritur në të gjithë zonën për të kapur autorin ose autorët.
Kjo është vrasja e tretë që shënohet në dy ditë në vendin tonë. Vetëm një ditë më parë, teksa pinte kafen e mëngjesit u ekzekutua me kallashnikov Besnik Hida, ndërsa në mesditë për shkaqe pronësie, Sadi Dakuci vrau vëllanë, Kujtim Dakuci dhe nipin Flogert Dakuci. Më pas Dakuci qëlloi edhe veten./Opinion.al
