Policia e Pogradecit ka sekuestruar një armë zjarri automatik, një armë gjahu teke, dy karikatorë automatiku dhe municion luftarak pa leje, teksa ka vënë në pranga një person të identifikuar me inicialet F. K nga Pogradeci.
Në bazë të informacioneve të siguruara në rrugë policore se një shtetas posedonte armë zjarri, shërbimet e Komisariatit të Policisë Pogradec, kanë mirëorganizuar punën dhe kanë ushtruar kontroll në banesën e tij në fshatin Rëmenj, Pogradec.
Forcat e policisë, gjatë kontrollit të ushtruar i gjetën dhe sekuestruan në cilësinë e provës materiale një armë zjarri automatik, një armë gjahu teke, dy karikatorë automatiku dhe një sasi municioni luftarak, të cilat ky shtetas i posedonte pa leje.
I arrestuar akuzohet për veprën penale “Armëmbajtja pa leje”, teksa materialet për këtë çështje i kaluan Prokurorisë së Rrethit Gjyqësor Pogradec për veprime të mëtejshme./Opinion.al
