Klement Çalës, një nga të dyshuarit si koka e grabitjes së Rinasit i janë sekuestruar pasuri që kap vlerën e 500 mijë eurove. Sipas policisë lokale, me vendi gjykate është sekuestruar 1 apartament me sipërfaqe 50 m2, në qytetin Elbasan. Po ashtu pasuri e llojit arë dhe truall me sipërfaqe 500 m2 dhe një ndërtesë e llojit njësi me sipërfaqe 167,9 m2 e ndërtuar mbi këtë pasuri, në vendin e quajtur Kusarth të Elbasanit.
Familjarët e tij po ashtu kanë patur dhe “Tokë arë: me sipërfaqe 809,5 m2, mbi të cilën është regjistruar kontrata e sipërmarrjes për ndërtimin e 3 vilave“Nga vlerësimi paraprak i pasurive të sipërshënuara, rezulton se ato kapin vlerën rreth 500.000 Euro”, njofton policia.
Shumë prej 10 mijë euro për të dhënë informacion për tre të dyshuarit e grabitjes deri tani nuk kanë shërbyer për asgjë. Të paktën 100 telefonata janë administruar nga uniformat blu, por pas verifikimeve asnjë prej tyre nuk ka rezultuar e vlefshme për kapjen e vëllezërve Klement dhe Eldi Çala si dhe mikut të tyre Talo Çela.
Sipas policisë të tre këta persona referuar sistemit TIMS rezultojnë në territorin shqiptar, por ka dyshime se janë larguar nga vendi ynë përmes kufirit të gjelbër.
Nga grabitja e 9 Prillit të këtij viti deri tani janë vënë në pranga Ragip Hajdini, Elton Pikli, Renaldo Sulaj, Oltjan Veseli, Saimir Çela dhe Alkond Bengasi. Ishte dëshmia e këtij të fundit që zbuloi grupin, pasi pranoi të bashkëpunojë me drejtësinë.
Më 15 Qershor të këtij viti u arrestua edhe Hasan Kanaçi, personi që dyshohet se informoi grabitësit nga brenda aeroportit për trasfertën e parave drejt Vienës. Gjatë kontrollit të ushtruar në banesën e Kanaçit, u gjetën rreth 100 mijë Euro, që dyshohet se janë grabitur në pistën e Rinasit. Ditën kur ndodhi ngjarja, humbi jetën si pasojë e shkëmbimit të zjarrit me policinë Admir Murataj, i cilësuar si një nga organizatorët e supergrabitjes./ Opinion.al
