Policia njofton se ka bërë ndalimin e shtetasit Geldo Hoti, i cili u kap dje në Kakavijë në tentativë për t’u larguar nga Shqipëria. Mësohet se Hoti ka qenë i pranishëm gjatë konfliktit në bllok mbrëmjen e së enjtes, ku një person u vra dhe dy të tjerë u plagosën. Në njoftimin e policisë, thuhet se ka dyshime që Hoti ka qëlluar me armë zjarri.
Njoftimi
Kapet dhe ndalohet një tjetër shtetas i përfshirë në konfliktin e ndodhur në një lokal në mbrëmjen e datës 05.09.2018, ku mbeti i vrarë shtetasi F. G., dhe u pagsën shtetasit E. M., dhe E. H.
Specialistët për Hetimin e Krimeve ndaj Jetës dhe Pronës në D.V.P. Tiranë në bashkëpunim me shërbimet e Policisë Kufitare Gjirokastër, mbasditen e djeshme kapën dhe ndaluan shtetasin:
– Geldo Hoti, 37 vjeç, banues në Tiranë.
Ky shtetas ka qenë i pranishëm gjatë konfliktit të ndodhur më datë 05.09.2018 në ambientet e brendshme të një lokali në rrugën “Ibrahim Rugova” dhe dyshohet të ketë qëlluar me armë zjarri gjatë konfliktit ku mbeti i vrarë shtetasi F. G., dhe u plagosën shtetasit E. M., dhe E. H.
Materialet iu referuan Prokurorisë së Rrethit Gjyqësor Tiranë në ngarkim të shtetasit të lartpërmendur për veprat penale “Vrasje në rrethana të tjera cilësuese kundër dy ose më shumë personave, mbetur në tentativë e kryer në bashkëpunim” dhe “Prodhimi dhe mbajtja pa leje e armëve luftarake dhe municionit”, parashikuar nga nenet 79/dh, 25, 278 të Kodit Penal.
