Nënkryetari i PD-së në Bashkisë Mallakastër, Hajredin Serjanaj gjatë një komunikimi telefonik ka deklaruar për Fax news se policia ka dashur të mbulojë ngjarjen kriminale që ka ndodhur ndaj tij pak ditë më parë, kur sipas tij, dy persona i kanë djegur makinën gjatë orëve të natës.
“Lidhur me ngjarjen, djegien e makinës, kemi pamje se është djegur nga dy persona, ngjarja është e qëllimshme, pamjet janë të qarta.
Nuk kam konflikte personale, por për shkak të detyrës mund të jenë krijuar konflikte. Kjo, pasi kanë qenë të shumta rastet e konflikteve gjatë ushtrimit të detyrës, lidhur me ndërtimet pa leje, lirimin e hapësirave publike, lirimin e rrugëve, etj.
Rreth 10 orë pas ngjarjes kam shkuar në polici për të dhënë deklarimet. Kur janë shuar flakët ka qenë i pranishëm edhe shefi i krimeve të Komisariatit të policisë Mallakastër dhe ai më ka thënë se është më mirë ta nxjerrim aksidentale, se është më mirë dhe për ju, edhe për ne. Une i thashe se dua të dali e verteta.
Më pas ka ardhur nëndrejtori i policisë së qarkut Fier, i cili sapo ka ardhur, pa kryer ende takimet e kortezisë, ka nderhyrë shefi i krimeve dhe i ka thënë se ishte aksidentale, se kishin parë edhe videot e kamerave të sigurisë e ngjarja ishte aksidentale.
Nëndrejtori dhe disa punonjës policie kanë ndenjur rreth 10 minuta e janë larguar duke thënë se do të vinte eksperti për të kryer ekspertimin
Në 6 të mengjesit policia dhe media e kanë raportuar ngjarjen se dyshohej se ishte aksidentale, pa u kryer ende ekspertiza
Ne kemi parë pamjet e kamerave të sigurise të një banesë afër vendit të ngjarjes, te cilat i ka pasur edhe policia. Aty duken qarte 2 persona te veshur me xhup dhe kapele qe i kanë vendosur flakën makinës në pjesen e përparme me lëndë djegëse.
Theksoj se ngjarja duhet të ketë ndodhur për shkak të detyrës, ndërkohë që policia ka dashur të mbulojë ngjarjen kriminale për të mos hapur panik tek qyetarët, edhe pse qyetarët jane në panik, pasi ky është thuajse një akt terrorist, që ka si qellim të hapi panik
Kërkoj nga institucionet përkatëse që të zbatohet ligji dhe të zbulohet e vërteta”, është shprehur ai.
Kujtojmë që ngjarja e papreçedentë ndodhi gjatë orëve të para të mëngjesit të 24 gushtit, ndërkaq policia e fshehu ngjarjen, duke theksuar në njoftimin zyrtar se makina ishte djegur si pasojë e një shkëndije elektrike dhe jo që ishte e qëllimshme.
Njoftimi i policisë
Informacion paraprak
Në datën 24.08.2018, rreth orës 02:35, në lagjen “29 Nëntori” Ballsh, është djegur mjeti tip BMV(i parkuar) në pronësi të shtetasit H.S (Nënkryetar i Bashkisë Ballsh).
Paraprakisht dyshohet se makina është djegur si pasojë e një shkëndije elektrike në mjet.
Në vendngjarje ka shkuar grupi hetimor i cili po punon për sqarimin e rrethanave dhe zbardhjen e plotë të kësaj ngjarje.
