I dërguari i posaçëm i Presidentit Donald Trump për dialogun Kosovë-Serbi, Richard Grenell ka qenë i prerë gjatë takimit me Presidentin serb, Aleksandër Vuçiç ku ka thënë se nëse palët nuk do të ulen në dialog atëherë SHBA do të tërhiqet.
Gjatë një konference të përbashkët me Vuçiç, një ditë pas takimeve me liderët politik në Kosovë, Grenell tha se palët duhet të jenë të qarta në kërkesat e tyre dhe nëse nuk dakordësohen për dialog ai kërcënoi se SHBA do të tërhiqej për tu marrë me diçka tjetër.
“Kur flasim rreth asaj nëse është e drejtë apo jo, nuk është për mua ta them. Më takon mua që të sjell dy palët në tavolinë, dhe është në dorë të palëve për të vendosur. Palët duhet të më thonë mua se çfarë mendojnë dhe çfarë duan. Unë po bëj përpjekje për një të ardhme më të mirë, për njerëzit në Kosovë dhe Serbi. Ne duhet të bëjmë gjithçka për të tejkaluar atë që të gjithë e shohin si një konflikt . Nëse dy palët nuk lëvizin dhe arrijnë një marrëveshje, në do të tërhiqemi”, tha Grenell.
Ambasadori Grenell filloi vizitën në rajon dy ditë pasi bashkë më këshilltarin e Sigurisë Kombëtare, Robert O’Brien, ndërmjetësoi një marrëveshje ndërmjet Kosovës dhe Serbisë për rihapjen e linjës ajrore Prishtinë – Beograd, në një përpjekje për përmirësimin e lidhjeve ekonomike midis dy vendeve. /Opinion.al
