Një i dënuar me 25 vjet heqje lirie nga burgu i Fierit ka denoncuar dhunën e ushtruar ndaj tij pak ditë më parë.
Andon Golemi nga Gjirokastra, i shpallur fajtor nga gjykata për veprën penale “rrëmbim personi”, pretendon se aktet e dhunës ndaj tij kanë ndodhur më 17 gusht 2016, brenda qelisë ku ai mbahej në burgun e Fierit.
Sipas të dënuarit, kanë qenë 12 të burgosur të tjerë që kanë hyrë në qelinë e tij dhe e kanë sulmuar. Drejtoria e Burgjeve e mohoi këtë fakt, duke thënë se i dënuari ka qenë problematik me sjelljen e tij.
“Jam me fat që kam shpëtuar gjallë, pasi isha një i vetëm ndaj atij grupi personash që hynë në qeli dhe më sulmuan”, tha Andon Golemi në një komunikim me telefon nga burgu i Fierit për redaksinë e gazetës “Panorama”.
Ai i vendosi gazetës në dispozicion edhe një ankesë me shkrim, me firmën e tij, një kopje të së cilës ia kishte dërguar edhe Avokatit të Popullit, Igli Totozani.
“Në orën 07:30, këtu hapen dyert e qelive, në orë 07:45 më erdhën hynë në qeli me leva me sende të forta dhe më sulmuan. U godita, por prapë mbeta i dëmtuar dhe më dërguan në spitalin e Fierit, ku më bënë pesë qepje në kokë”, tha i dënuari gjatë telefonatës me gazetën “Panorama”.
“Unë s’kisha asnjë gjë, asnjë lloj problemi, isha në gjumë kur erdhën më hynë në qeli”, ka thënë 39vjeçari Ai pretendon se me gjithë dëmtimet shëndetësore që ka pësuar nga sulmi në qeli, pasi ka marrë mjekim në spitalin e Fierit e kanë dërguar në spitalin e burgut.
Aty i kanë shkuar policët e burgut dhe i kanë thënë që ta dërgonin në izolim.
“Më erdhën nga grupi i gatshëm, më thanë eja se do të shkosh në izolim. Kërkova urdhrin me arsyen pse ishte vendosur kjo. Më thanë shefi i policisë e di këtë. Pasi u ankova, erdhi oficeri i rojës dhe më tha rri edhe dy ditë këtu”.
Ndërkohë, në datën 20 gusht, i dënuari thotë se e kanë thirrur te Komisioni i Disiplinës për t’i njoftuar masën ndëshkimore në lidhje me ngjarjen e ndodhur. Ai thotë se raporti i shërbimit me masën ndëshkimore i është njoftuar me shumë vonesë pak ditë më parë.
“Unë nuk kërkoj asgjë, të verifikohet ngjarja sepse po bëhet diskriminim. Këtu, në këtë burg, shefi i policisë më dërgoi në izolim kur isha palë e dëmtuar, ndërkohë që ndaj personave kryesorë që bënë ngjarjen e sulmit tim nuk ka marrë asnjë masë”, theksoi Andon Golemi.
Ai pretendon se ka rrezikuar jetën në këtë ngjarje, ndërkohë që shefi i policisë së burgut nuk ka vendosur masë ndëshkuese ndaj personit kryesor që ka marrë pjesë në sulmin ndaj tij në qeli.
I pyetur nga gazeta se cilët ishin autorët e sulmit ndaj tij, i dënuari tha: “Janë të dënuar, nuk kam pasur dhe nuk kam asnjë problem me ta, unë tani kundërshtoj padrejtësinë që po më bëhet me masën disiplinore kur jam palë e dëmtuar.
Mua më erdhi SHKBja e burgjeve dhe nuk bëra denoncim, pasi nuk dua të merrem me këto gjëra”.
Drejtoria e Burgjeve tha për “Panorama” se ka verifikuar raportin e policisë së burgut dhe pamjet e kamerave të sigurisë, që hedhin poshtë akuzat e të dënuarit. Megjithatë, atij i është kërkuar të bëjë denoncim, por nuk ka pranuar.
