Pasi ka kryer pjesën më të madhe të dënimit dhe i kanë mbetur vetëm 12 muaj për të shlyer, i dënuari në Burgun e Drenovës u bën apel instancave të marrin parasysh kërkesën e tij, që ta shlyejë këtë pjesë në shërbim prove, pasi jeta e tij është në rrezik.
Hyqmet Spahollari është dënuar me vendim të formës së prerë me 7.6 vite burg, pasi u kap me 100 gramë drogë në Elbasan në vitin 2011.
Por, ndonëse ai është invalid i grupi të dytë, sipas tij gjykata nuk ka marrë parasysh këtë fakt e për rrjedhojë dënimin e tij me minimumin e nenit që e kap, ashtu sikurse e parashikon ligji. 61vjeçari thotë se nuk ka pasur para të paguajë shumat që i kanë kërkuar, e për këtë shkak nuk i kanë njohur madje as gjykimin e shkurtuar.
Nëpërmjet një letre të hapur, publikuar nga “Panorama”, Spahollari i drejtohet ministrit të Drejtësisë, por edhe Kryeministrit, për të gjetur një zgjidhje, pasi ai është invalid dhe trajtohet me një sërë medikamentesh për disa sëmundje.
LETRA
“Po ju kërkoj ndihmë, pasi jeta ime është në rrezik për arsye se zemra ime do edhe një unazë tjetër.
Kështu më kanë thënë mjekët që më kanë vizituar.
Quhem Hyqmet Spahollari, i datëlindjes 1955. Jam 61 vjeç. Më datën 15 tetor të vitit 2011 jam arrestuar në qytetin e Elbasanit.
Jam akuzuar për prodhim dhe shitje të lëndëve narkotike të llojit heroinë. Sasia ishte 100 gramë. Nga pastrimi që i bëri vetë policia rezultoi 4.7 gramë e pastër, tjetra përzierës. Për këtë sasi kaq të vogël filloi karvani i gjyqeve.
Në Gjykatën e Elbasanit kam bërë 26 seanca. Gjashtë seanca të tjera në Apelin e Durrësit. Pra, gjithsej 32 seanca për 100 gramë, ose 4.7 gramë, quajeni si të doni. U dënova 7.6 vjet burg. Dua t’ju vë në dijeni se ekziston një ligj që një invalid i grupit të dytë, siç jam unë, duhet të dënohet me minimumin e nenit që e kap. Por unë nuk kisha të ardhura, as buxhetin që m’u kërkua, ndaj përfundova me 7.6 vite burg.
Nuk përfitova as gjykimin e shkurtuar, ku më ulej 1/3 e dënimit”, thuhet në letrën e hapur të 61vjeçarit, i cili edhe gjatë bisedës me linjë telefonike konfirmoi se shëndeti i tij ishte i plogësht, pasi vuante nga një sërë sëmundjesh, si zemra, hipertensioni, prostata, por 42 vite më parë i kanë hequr edhe një veshkë gjatë shërbimit ushtarak.
KERKESA
“Vendosa të shkruaj jo vetëm se dua të përfitoj 1 vit që më ka mbetur dhe të më lirojnë, por që të sensibilizoj drejtuesit që kanë në dorë fatin e shqiptarëve, që nuk kanë para të marrin drejtësinë që u takon apo dënimin që meritojnë.
Unë kam kryer rreth 4.9 vjet burg. 16 muaj i kam fituar nga paraburgimi, disa muaj nga sjellja. Më kanë mbetur edhe 12 muaj. Kam kërkuar të më lënë me shërbim prove, pasi i plotësoj të gjitha kriteret që kërkon ligji.
Gjykata e Pogradecit ka vendosur 200 mijë lekë në vitin 2005 ndaj meje pasi nuk kisha paguar te tatimtaksat, vepër e cila është amnistuar më pas.
Por Gjykata e Korçës, ku unë kam kryer 8 seanca të tjera, ma ka mohuar të drejtën e lirisë pikërisht me këtë argument, se unë paskam qenë i dënuar më parë. E theksoj se vepra ime është amnistuar.
Po ju vë në dijeni se unë vuaj nga diabeti, hipertensioni, vuaj nga zemra dhe kam vënë edhe unazë, pasi në burg pësova infarkt dhe më çuan me urgjencë në Tiranë. Kam 42 vjet që kam hequr veshkën e majtë gjatë shërbimit ushtarak, kam humbur 70 për qind të dëgjimit, vuaj nga prostata.
A mund të krahasohem unë me Al Kaponen e Amerikës, me 100 gramë drogë?!”, thuhej më tej në letrën e dërguar nga ana e 61vjeçarit Spahollari.
PERGJIGJA E MINISTRIT
Ministri i Drejtesise, Ylli Manjani, ka vleresuar me perparesi kerkesen e Hyqmet Spahollari. Qe prej dates 20 korrik 2016 Spahollari i eshte caktuar nje Avokat falas nga ana e Komitetit te Ndihmes ligjore.
Nderkohe, diten e sotme Ministri Manjani ka urdheruar edhe administraten e Drejtorise se Burgjeve qe te filloje proceduren e pergatitjes se dokumentacionit per faljen e te denuarit.
Manjani kerkon qe ketij shtetasi t’i krijohet nje mundesi ligjore qe t’i lejoje trajtim shendetesor te specializuar ne menyre perfundimtare.
PANORAMA
