Është arrestuar në Greqi i shumëkërkuari Laert Haxhiu. Haxhiu është kapur në Janinë me qëllim ekstradimin drejt vendit tonë.
Sipas informacioneve ai qëndronte në shtetin grek me leje qëndrimi greke të falsifikuar me emrin M. A., 32 vjeç.
“Në kuadër të operacionit të koduar “Eksponenti”, në Janinë, nga Policia greke është bërë e mundur kapja dhe arrestimi me qëllim ekstradimin e shtetasit shqiptar shumë të kërkuar Laert Haxhiu, 31 vjeç, lindur në Lushnjë. Gjykata e Rrethit Gjyqësor Lushnjë, në vitin 2017, e ka dënuar këtë shtetas me 18 vjet burgim, për veprat penale “Vrasja në rrethana cilësuese”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit”. Interpol Tirana vijon bashkëpunimin me Interpol Athinën, me qëllim kryerjen e procedurave për ekstradimin e këtij shtetasi, drejt vendit tonë”-njofton policia.
Haxhiu akuzohet si një nga personat e përfshirë në masakrën e Lushnjës, ku mbetën të vrarë Jurgen Hoxha dhe Zamir Latifi.
Për këtë ngjarjë janë dënuar më herët me burgim të perjetshëm Oges Bilbili dhe Anterio Kaloshi.
Po ashtu ata kanë tentuar të vrasin Xhulio Shkurtin, nipin e Aldo Bares, ngjarje këto të ndodhura në vitin 2017.
Laert Haxhiu njihet si rival i bandës së Aldo Bares./Opinion.al
