Donald Trump ka urdhëruar lirimin e ish-kongresmenit republikan George Santos, i cili u burgos për më shumë se shtatë vjet nën akuzat për mashtrim dhe vjedhje identiteti.
Në një postim në rrjetet sociale, Trump e pranon se Santos ishte “disi një mashtrues”, por sipas tij në Shtetet e Bashkuara ka shume mashtrues që nuk detyrohen të vuajnë 7 vjet burg.
“Paç fat George, paç një jetë të mrekullueshme!” shkroi Trump.
Ish kongresmeni i Nju Jork u dënua në muajin prill me 7 vite burg, pasi shfrytëzoi sistemin e financimit të fushatës dhe partinë e tij politike, donatorët dhe anëtarët e familjes për të mbushur xhepat e tij.
Pasi u bë republikani i parë homoseksual i zgjedhur në Kongres në vitin 2022, Santos shërbeu më pak se një vit para se të zbulohej se ai kishte sajuar pjesën më të madhe të historisë së jetës së tij.
Gjatë fushatës, Santos kishte pretenduar se ishte një konsulent biznesi i suksesshëm me një portofol të konsiderueshëm pasurish të paluajtshme.
E gjitha kjo doli të ishte e pavërtetë e madje Santos kishte gënjyer dhe për besimin e tij, pasi nuk ishte hebre, por një katolik.
Lirimi i Santos vjen pas një fushate që kërkonte që presidenti Trump ta falte. Vendimi u prit me kritika nga disa republikanë, por u mbështet nga të tjerë
Pasi filloi mandatin e tij të dytë, republikani I ka përdorur fuqitë e tij presidenciale për të falur shumë persona. Në ditën e parë në detyrë ai fali më shumë se 1500 njerëz të përfshirë në trazirat e Kapitolit të 6 janarit 2021.
