Policia Kufitare e Morinës ka arrestuar një 58-vjeçar ukrainas, i cili ishte i dënuar me 25 vite burg në Peru.
Uniformat bu bëjnë me dije se bëhet fjalë për shtetasin Dmytro Chornyi, 58 vjeç banues në Ukrainë.
Nga informacionet zyrtare mësohet se ukrainasi ishte dënuar për trafikim të armëve dhe për krime kundër shtetit, dhe si pasojë Policia Kufitare e Morinës në bashkëpunim me Drejtorinë Vendore të Policisë Kukës dhe Interpol Tirana kanë bërë të mundur arrestimin e tij me qëllim ekstradimin drejt Perusë.
“Krahas angazhimit maksimal për të ofruar shërbim cilësor, të shpejtë dhe me etikë, për qytetarët në hyrje/dalje të vendit, shërbimet e Policisë Kufitare të PKK Morinë kanë vijuar punën për goditjen e paligjshmërive në kufi, si dhe për ndalimin e shtetasve që sinjalizohen si të shpallur në kërkim dhe tentojnë të hyjnë apo të dalin nga kjo pkk.
Në këtë kuadër, në bashkëpunim me shërbimet e Drejtorisë Vendore të Policisë Kukës, dhe si rezultat i shkëmbimit të informacioneve nga shërbimet e Interpol Tiranës, u ndalua dhe u vu në pranga, me qëllim ekstradimin drejt Perusë, shtetasi i kërkuar ndërkombëtarisht Dmytro Chornyi, 58 vjeç, banues në Ukrainë.
Gjatë verifikimeve dhe intervistimit në vijë të dytë, në hyrje të vendit, rezultoi se 58-vjeçari ishte i dënuar nga autoritetet gjyqësore të Perusë, me 25 vjet burgim, për veprat penale “Trafikimi i armëve” dhe “Krimet kundër shtetit dhe mbrojtjes kombëtare”, të parashikuara nga legjislacioni penal i Perusë. Interpol Tirana vijon të bashkëpunojë me homologët në Peru, për ta ekstraduar shtetasin Dmytro Chornyi, drejt këtij shteti”, njofton policia./Opinion.al
