Një 62-vjeçar është arrestuar në Durrës, pasi ishte dënuar me 17 vite burg për drogë në Itali.
Policia bën me dije se në kuadër të operacionit policor të koduar “Koordinatat”, në pranga ra Mustafa Shullani me tre identitete të tjera: Hasan Shullani, Ferdinand Behari dhe Faje Shullani.
Gjykata e Apelit e Bolonjës, e ka dënuar 62-vjeçarin, me 17 vjet e 1 muaj burgim, për veprat penale “Trafikimi i lëndëve narkotike” dhe “Prodhimi dhe shitja e narkotikëve”, të parashikuara nga ligji penal italian. Me qëllim vuajtjen e periudhës prej 11 vjet e 4 muaj burgim, të mbetur nga dënimi total, kjo gjykatë apeli ka lëshuar për këtë shtetas, një urdhër-arrest ndërkombëtar.
Materialet i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme.
Në bashkëpunim me Interpol Tiranën, vijon puna për ekstradimin e 62-vjeçarit, drejt Italisë.
