Pasi Erion Veliaj deklaroi nga qelia se gjatë seancës në GJKKO ishte cilësuar si person i dënuar më parë, në një kohë që sipas tij, një gjë e tillë është e pavërtetë, SPAK i kërkoi informacion Drejtorisë së Përgjithshme të Burgjeve.
Zyrtarisht Drejtoria e Përgjithshme e Burgjeve deklaron se Erion Veliaj rezulton i padënuar. Në lidhje me këtë kërkesë, Drejtoria e Përgjithshme e Burgjeve thotë gjithashtu se ndaj tij ka 3 vendime pafajësie.
NJOFTIMI
Në përgjigje të interesimit të mediave, Drejtoria e Përgjithshme e Burgjeve bën me dije se, në përgjigje të kërkesës së Prokurorisë së Posaçme Kundër Korrupsionit dhe Krimit të Organizuar, me shkresën nr. 2215/prot., datë 12.02.2025, ka përcjellë vërtetimin e gjendjes gjyqësore për shtetasin E. V., i biri i L. dhe Sh., lindur më 17.12.1979.
Pas verifikimeve në Regjistrin e Gjendjes Gjyqësore, ai rezulton i padënuar dhe ndaj tij janë dhënë tre vendime pafajësie.
Sqarojmë se, në rastet kur kërkohet vërtetimi me historik, përfshihen edhe të dhënat mbi vendimet e mëparshme, përfshirë pafajësitë apo vendimet e rehabilitimit, në përputhje me legjislacionin në fuqi.
