Policia Kufitare e Rinasit ka arrestuar një pasagjer sapo aeroplani është ulur në aeroportin “Nënë Tereza” pasi ishte në gjendje të dehur.
Uniformat blu janë njoftuar nga stafi i linjës së fluturimit se i riu me iniciale E.N. 23 vjeç po konfliktohej me pasagjerët në avion për shkak se ishte i dehur.
Ndërkohë, një tjetër udhëtar u procedua në gjendje të lirë, pasi tentoi të korruptonte punonjësit e policisë në aeroportin e Rinasit.
Sipas informacioneve zyrtare mësohet se 49-vjeçari me iniciale S.P. kërkonte të udhëtonte drejt Italisë, por nuk i lejohet të dali jashtë Shqipërisë pasi në vitin 2021 ishte kthyer deportiv nga Greqia.
Kështu ndaj tij nisi hetimi në gjendje të lirë pasi i ofroi 50 Euro policit kufitar që ta lejonte të udhëtonte.
“Krahas angazhimit maksimal për t’iu ofruar qytetarëve në hyrje/dalje, shërbim cilësor, të shpejtë dhe me etikë, shërbimet e Policisë Kufitare të Rinasit kanë vijuar punën për të parandaluar dhe për të goditur paligjshmëritë. Për 2 rastet e konstatuara së fundi:
-është arrestuar në flagrancë shtetasi E. N., 23 vjeç, pasi në mesnatë, kanë njoftuar punonjësit e një linje fluturimi, në hyrje të vendit, se ky shtetas duke qenë në gjendje të dehur, po konfliktohej me pasagjerët në avion. Menjëherë pas njoftimit, kanë ndërhyrë shërbimet e Policisë, të cilat kanë neutralizuar shtetasin E. N. 23-vjeçari, gjatë shoqërimit, ka kundërshtuar me dhunë, efektivët;
-janë referuar materialet në Prokurori ku ka nisur procedimi në gjendje të lirë për shtetasin S. P., 49 vjeç, pasi ka tentuar të korruptojë punonjësit e Policisë, me një kartëmonedhë 50 euro, që të dilte nga vendi ynë, drejt Italisë. Ky shtetas ishte i pajisur me aktin e refuzimit të daljes, sepse në vitin 2021 ishte kthyer deportiv nga Greqia”, tha policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme./Opinion.al
