Aty ku sot ndodhet selia e Bashkisë së qytetit të Majemit, në Florida, në vitet ’50 ndodhej një shesh dedikuar koncerteve dhe eventeve të ndryshme. Ajo hapësirë mund të mirëpriste deri në gjashtë mijë njerëz, por në 1 mars të vitit 1969 priti thuajse dyfishin, me mijëra njerëz që mbetën jashtë. Gjithë ata persona ishin aty për të ndjekur atë që supozohej të ishte koncerti i grupit të njohur muzikor “The Doors”, por që në fund u “katandis” në atë që quhet “Incidenti i Majemit”.
Në vitin 1969 “The Doors” ishin të famshëm si në Amerikë, ashtu edhe përtej oqeanit. Kishin publikuar tre albume ku përfshiheshin disa prej këngëve më të njohura si “Light My Fire” dhe “People Are Strange”, ashtu sikurse kishin fituar edhe shumë çmime. Por në atë moment grupi po përjetonte një çast të vështirë, për shkak të problemeve të Jim Morrison me alkoolin. Koncerti i parashikuar për në Majemi shkoi keq që në përgatitje. Morrison nuk hipi në avionin që do ta çonte bashkë me pjesën tjetër të grupit në Majemi për të bërë provat dhe për shkak të një zënke me të fejuarën, humbi edhe avionin e dytë. Pas disa orësh në lokalin e aeroportit, mbërriti në Majemi 20 minuta më vonë se orari kur duhej të fillonte koncerti, krejtësisht i dehur.
Pak pas fillimit të koncertit, Morrison nisi të fyente spektatorët, duke i quajtur “idiotë të ndyrë”, i hoqi kapelen një polici që ndodhej pranë skenës dhe e hodhi në turmë, ndërsa gjëja më e çuditshme e asaj nate ishte kur në një moment mori në krahë një qengj të vogël, duke thënë se kafsha e gjorë ishte shumë e vogël për të bërë seks. Më pas, Morrison nisi të zhvishej në skenë duke u kërkuar të pranishmëve të bënin të njëjtën gjë. Gjithçka përfundoi me degjenerimin e situatës dhe ndërhyrjen e policisë, në një koncert që nuk zgjati as një orë.
Sipas dëshmive të mëvonshme, sjellja e Jim Morrison gjatë koncertit të Majemit, përveç alkoolit, u ndikua edhe nga një shfaqje eksperimentale që kishte parë një javë më përpara në Los Angeles. Spektakli jepte mesazhin politik “revolucionar” sipas të cilit ndryshimi mund të vijë vetëm përmes refuzimit të çdo rregulli konvencional.
Por kjo nuk ishte hera e parë që Morrison shkaktonte trazira në skenë. Në vitin 1967 ai u arrestua gjatë një koncerti në New Haven, në Connecticut. Në dokumentarin “When You’re Strange”, që flet edhe për shumë nga momentet e Majemit, tregohet se pak përpara fillimit të koncertit në New Haven Morrison po puthej me një vajzë në prapaskenë. Të dy u panë nga një polic, i cili duke mos njohur Morrisonin, i tha që të largoheshin. Në këtë moment, Jim Morrison e ofendoi disa herë, deri sa polici e neutralizoi me një spraj në fytyrë. Pas kësaj, Morrison hipi në skenë dhe tregoi gjithçka që ndodhi, por menjëherë u rrethua nga policët: u lirua pak orë pasi u arrestua.
Për t’u rikthyer te ngjarja e Majemit e 1 marsit 1969, Jim Morrison u akuzua se kishte hequr pantallonat duke kryer veprime të turpshme në skenë. Megjithëse kishte dëshmi kontradiktore dhe nuk kishte asnjë fotografi që të tregonte se kjo gjë ishte e vërtetë, Jim Morrison u dënua me gjashtë muaj burg dhe një gjobë prej 500 dollarësh. Por dënimi nuk u zbatua, pasi avokatët e tij e apeluan. Megjithatë, gjyqi i apelit nuk u zhvillua kurrë.
Më 3 korrik të vitit 1971, Jim Morrison u gjet i vdekur në vaskën e apartamentit të tij në Paris, me shumë mundësi për shkak të një overdoze me heroinë. Më 9 dhjetor 2010 iu dha pafajësia pas vdekjes, me një vendim të ish-Guvernatorit të Floridas, Charlie Crist./Përgatiti Erjon Uka, Opinion.al
