Kryeministri Rama i është drejtuar me një tjetër ftesë për bashkëpunim kreut të opozitës, Lulzim Basha.
“Eja të bashkëpunojmë” shkruan Rama në Tëitter, por ndërkohë thekson se gjetja e personave “të pasistemuar” për përdorim politik është gjëja më e keqe që mund të bëjë një politikan sipas tij.
“I dashur Lulzim, asgjë më të keqe s’mund të bëjë një politikan në këto ditë të zymta, se sa të kërkojë raste njerëzish ende të pasistemuar për t’i përdorur për politikë! Ka shumë akoma që duan dorën tonë dhe ngrohtësinë e kujtdo që mundet t’ua japë! Eja të bashkëpunojmë…Mos u mjafto me fjalët e errëta e me pamjen që dukesh sikur e ke humbur ti shtëpinë, jo ata fatkeqë që kështu bëhen sfond mediatik, për të përcjellë zymtinë e politikës së stërvjetër, në vend të ngrohtësisë njerëzore! Le t’i ndihmojmë së bashku me pak dritê, se zymti kanë boll”, shkruan Rama.
Më herët Basha u shpreh se ftesa për tu ulur në tryezë është pjesë e propagandës pasi sipas tij njerëzit kanë nevojë që ata të jenë në terren dhe se plani me tre pika i opozitës është i qartë për tu zbatuar nga qeveria. Ai cilësoi gjithashtu se shembja me shpejtësi e banesave në Durrës është një akt kriminal i cili po pengon marrjen e provave materiale nga ana e qeverisë. /Opinion.al
