Tre shqiptarë dhe dy italianë janë arrestuar nga policia italiane pasi dyshohet se ishin autorët e një prite me armë, ngjarje kjo e ndodhur më 18 qershor.
Të arrestuarit janë shtetasit Angelo Bonfiglio, 56 vjeç dhe Riçardo Berrica, 19 vjeç, banues në Ceriana dhe tre shqiptarët Fernando Shemuni, 35 vjeç, Klodian Kola, 32 vjeç dhe Enea Dema, 34 vjeç të cilët ndanin shtëpinë me miqtë e tyre italianë.
Për pesë të arrestuarit rëndon akuza “Plagosje e rëndë me paramendim”.
Sipas policisë italiane, dy persona të cilët po udhëtonin me skuter në rrugën holandeze, në Sanremo, mbetën të plagosur nga të shtënat me armë.
Hetuesit mendojnë se kjo ngjarje mund të ketë lidhje me pazret e drogës. Hetimet nga policia nisën pas lajmërimit të marrë se dy persona ishin paraqitur në urgjencë të plagosur me armë zjarrë.
Nga hetimet e bëra rezultoi se pesë autorët ishin ndalur në rrugën holandeze me një furgon tip “Fiat Doblo”, të drejtuar nga Bonfiglio dhe kanë pritur të kalojë skuteri. Në raportimin e tyre thuhet se njëri prej të plagosurve O.S duhet t’ia kishte kthyer gjerdanin Berricës, që dyshohet se ishte marrë peng për një borxh droge.
Gjatë kontrollit të bërë, karabinierët gjetën municion pushke të kalibrit 20 dhe 12.
Nga marrja në pyetje e të plagosurve, policia italiane gjurmoi oraret, automjetet, itineraret dhe marrëdhëniet mes personave të përfshirë.
Ishin pamjet e sigurisë, që ndihmuan në kapjen e pesë autorëve të dyshuar, ndërsa gjyqtari hetues ka vendosur masën e sigurisë arrest me burg për ta.
