Ka dyshime të forta se avokati 50-vjeçar, Ravik Gurra u ekzekutua nga vrasës me pagesë. Disa persona u shoqëruan në komisariatin e Elbasanit për tu marrë në pyetje në lidhje me vrasjen e avokatit të njohur, por deri tani autoritetet kanë pak prova në duar.
Mes tyre kanë dëshmuar edhe miqtë që ndodheshin në tavolinë me të, kur 50 -vjeçari u qëllua me tre plumba pas koke. Ravik Gurra u ekzekutua ndërsa ishte duke pirë kafe në ambientet e jashtme të një lokali shumë të frekuentuar nga qytetaret elbasanas. Autori është afruar dhe e ka eliminuar duke përdorur armë me silenciator.
Më pas ai është larguar i ndihmuar nga një automjet që qëndronte në largësi dhe që u gjet pak minuta pas ngjarjes i djegur në periferi të Elbasanit në afërsi të fshatit Bradashesh.
Për të zbardhur sa më parë ngjarjen, policia sekuestroi edhe pamjet e dy kamerave të sigurisë së lokalit, por asnjëra prej tyre nuk ka mundur të fiksojë lëvizjet e vrasësit.
Ravik Gura ka një karrierë 10 vjeçare si avokat. Ai ka pasur në duar disa nga dosjet më të nxehta, si ajo e fisit Çapja në Elbasan, apo edhe mbrojtësi ligjor i Emiljano Shullazit, dosja e të cilit tashmë ndodhet në apel./Opinion.al
LEXO EDHE: “S’të lanë të bëhesh 65 vjeç avokat”
