Arvis Muçaj, është njëri prej 5 të arrestuarve për ngarkesën prej 1.3 ton kanabis që u kap në Kavajë.
Ai doli para gjykatës për masën e sigurisë dhe shpërtheu në lot teksa pretendoi pafajësinë.
Makina Land Rover që u gjet e mbushur me drogë ishte shitur nga Arvis Muçaj tek shtetasi E.Sina nga Vlora i cili është në kërkim. Por gabimi i të riut është se nuk kishte kryer veprimet noteriale.
E. Sina. Dyshohet të jetë organizatori i trafikut të drogës. Muçaj i përlotur shpjegoi para gjyqtarëve se i kishte kërkuar E.Sinës që të nënshkruante aktin noterial të shitblerjes së makinës, por ai e kishte zvarritur ditë pas dite këtë gjë, madje i kishte ngelur borxh edhe 300 euro.
“Unë nuk kam lidhje me personat e arrestuar në Kavajë. Nuk jam marrë kurrë me drogë. Më 27 gusht unë martohem, mos ma shkatërroni jetën, dhe nëse del që unë kam lidhje me këtë histori, atëherë më dënoni maksimalisht. Por ju keni përpara një të pafajshëm, sepse unë nuk kam asnjë lidhje me këtë çështje”, – tha dje me lot në sy Muçaj para trupit gjykues.
Pavarësisht lutjeve të tij, gjykata e la në arrest me burg Muçajn bashkë me 4 të arrestuarit e tjerë.
