Ka ndërruar jetë në QSUT, Jani Rustemi, personi i cili përfundoi në koma pasi dyshohet se iu dha një dozë e lartë metadoni.
Sipas informacioneve, Rustemi, i cili ishte i shtruar në Reanimacionin Qendror në QSUT, në orën 16:20 ka ndërruar jetë.
Mësohet se 27-vjeçari u arrestua më 12 Prill 2023 për vjedhjen e një tapeti dhe një palë atlete. Por 5 ditë më vonë, më 17 Prill, Jani Rustemi u dërgua në Urgjencën e QSUT në gjendje të rëndë.
E ëma e të riut, Pranvera Rustemi denoncoi për herë të parë në emisionin “Uniko” rastin, duke thënë se policia nuk i ka dhënë asnjë informacion. Ajo tha se djali nuk vuan nga asnjë sëmundje. Sipas saj mjekët në QSUT i thanë se të birit i kanë dhënë shumë metadon.
Më pas reagoi policia. Sipas uniformava blu, Rustemi më datë 14 Prill, teksa ka qenë i arrestuar në Drejtorinë e Policisë së Tiranës ka shfaqur shqetësime shëndetësore. Po në të njëjtën ditë, sipas policisë, i është dhënë ndihma e nevojshme mjekësore dhe gjendja e tij është përmirësuar.
Uniformat blu bënë me dije se më 17 Prill, i riu ka shfaqur sërish shqetësime shëndetësore. Po këtë ditë, ai është transportuar në spitalin “Nënë Tereza” ku është shtruar në spital, ku dhe ndërroi jetë./Opinion.al
