Ka dalë sot para gjykatës Dorjan Keqi, 40-vjeçari i akuzuar për vrasjen e ish-drejtorit të OST, Saimir Jaku në vitin 2016.
Mësohet se trupi gjykues ka dhënë masën e sigurisë “Arrest me burg”, për 40-vjeçarin.
Keqi ka mohuar akuzat dhe ka folur nëpërmjet avokatit duke deklaruar se ditën e ngjarjes ka qenë në Vinjoll të Kurbinit.
Sipas policisë, Keqi në bashkëpunim me shtetas të tjerë, dyshohet se e ka kryer vrasjen, kundrejt pagesës. Ndërkaq, porositësit e vrasjes dyshohet të jenë një grup i strukturuar kriminal që vepron në qarkun Lezhë, tashmë të identifikuar dhe nën hetim nga ana e Policisë.
Ndaj tij janë ngritur akuza për veprat penale “Vrasja në rrethana të tjera cilësuese”, kryer në bashkëpunim dhe “Prodhimi dhe mbajtja pa leje e armëve luftarake e municionit”.
Kujtojmë se Keqi u arrestua disa vite më vonë pas krimit, pasi drejtonte mjetin në gjendje të dehur. Pasi iu morën shenjat e gishtërinjve, rezultoi se gjurmët e tij ishin gjetur në bidonin me benzinë që u përdor nga autorët për djegien e makinës që u përdor ditën e krimit në Rrëshen.
