Pas tre muajsh në arrati, është dorëzuar në polici ish-shefi i Rendit në Kurbin, Ylli Vata.
Ai akuzohet se ka lidhje me grupet kriminale të kultivimit të kanabisit në malësinë e Kurbinit.
Prej tre muajsh, Vata ishte në kërkim nga policia, ndërsa është dorëzuar vetëm paraditen e kësaj të marte.
Ka qenë Gjykata e Krimeve të Rënda e cila ka dhënë vendimin “arrest me burg” pas kërkesës së Prokurorisë në ngarkim të ish-shefit të Policisë.
Mësohet se organi i akuzës ka arritur të provojë përfshirjen e Vatës në kultivimin e kanabisit në zonat përreth Kurbinit.
Ylli Vata bëhet një tjetër drejtues policie, pas atij të Vlorës dhe Tepelenës, të cilët ranë në prangat e policisë për bashkëpunim me kultivuesit e lëndëve narkotike.
