Mbrëmjen e së dielës në orën 23:20, persona ende të paidentifikuar kanë djegur makinën e gjyqtarit të Gjykatës së Shkallës së Parë të Shkodrës, Andri Ymeri.
Ymeri ka qenë më parë drejtues i Gjykatës së Shkodrës, por emri i tij është përmendur edhe për përfshirje në raste korruptive.
Në vitin 2014, ai u akuzua se kishte marrë 2 mijë euro për të liruar nga burgu një të dënuar. Rasti u denoncua në emisionin “Fiks Fare” ku u publikuan disa biseda të avokatit Ndrek Ruka i cili deklaronte se paratë i kishte marrë për gjyqtarët. Për këtë çështje Prokuroria e Krimeve të Rënda nisi hetimet.
Gjyqtari Ymeri është akuzuar edhe nga një i dënuar me 21 vite burg në mungesë, Gentian Hoxha. Po në vitin 2014 ai ka bërë një kallëzim në Prokurorinë e Përgjithshme ku pretendon se i janë kërkuar 25 mijë euro nga Andri Ymeri për të hapur sërish çështjen.
Gjyqtari u akuzua në atë kosh për shpërdorim detyre dhe mosmbajtje të procesverabeleve të çështjes në vitin 2009. Mesa duket gjyqtari ka arritur ti shpëtojë akuzave ndaj tij dhe ndodhet sërish në krye të detyrës.
Mësohet gjithashtu se bashkëshortja e tij Arjola Ymeri është Prokurore në Prokurorinë e Shkodrës ndërsa vëllai i tij është avokat.
Në dëshminë e tij pas ngjarjes së ndodhur mbrëmjen e së dielës, gjyqtari Ymeri ka deklaruar se nuk ka konflikte që mund të rrjedhin nga detyra e tij. /Opinion.al
