Një gjykatë në Pakistan e dënoi ish-kryeministrin e vendit, që tashmë gjendet në burg, Imran Khan, me 14 vjet burgim, ndërkaq gruan e tij me shtatë, pasi i gjeti fajtorë nën akuza për korrupsion, thanë zyrtarët dhe avokatët e tij.
Pas vendimit, në llogarinë në X të Khanit u tha se ai kurrë nuk do të pranojë “këtë diktaturë”.
“Unë do të qëndroj në burg për aq kohë sa të jetë e nevojshme në luftën kundër kësaj diktature, por kurrë nuk do të bëj kompromis me parimet e mia dhe luftën për liri të vërtetë të kombit”.
Ai po ashtu tha se gruaja e tij u dënua “vetëm për të më bërë presion mua dhe për të më lënduar mua”.
Çifti është akuzuar se kur Khan ishte në pushtet, ka pranuar dhuratë një tokë nga një pasanik i patundshmërive, në këmbim të pastrimit të parave.
Prokurorët thanë se biznesmeni, Malik Riaz, më pas u lejua nga Khani që të paguante gjoba që i ishin vendosur për një rast tjetër me të njëjtat para të pastruara prej 190 paundësh britanikë (240 milionë dollarë). Këto para u kthyen në Pakistan nga autoritetet britanike më 2022 për t’u depozituar në thesarin e shtetit.
Khan ka mohuar akuzat dhe ka insistuar se që nga arrestimi i tij më 2023 se të gjitha akuzat kundër tij janë komplot nga rivalët që ta mbajnë larg garimit për post shtetëror.
Khan, që u bë kryeministër më 2018, u rrëzua nga pushteti përmes një mocioni mosbesimi në Parlament prillin e vitit 2022.
Khan, 72 vjeç, përballet me më shumë se 150 raste penale, edhe pse ai gëzon popullaritet të madh në mesin e pakistanezëve.
Ai dhe partia e tij politike, Pakistan Tehrik-e Insaf (PTI) kanë thënë se këto raste janë të motivuara politikisht.
Vendimi Khanit iu shqiptua në gjykatën në burgun në Ravalpindi, ku po vuan dënimin ai.
Mediat lokale raportuan se bashkëshortja e tij, Bushra Bibi, u dërgua në paraburgim pak pas shqiptimit të dënimit, pasi ajo gjendej në lirim me kusht.
Avokati i Khanit, Faisal Chaudhry, tha se dënimi do të apelohet, teksa ligjvënësit nga PTI-ja u mblodhën jashtë Parlamentit, duke thënë se ish-kryeministri ishte ndëshkuar padrejtësisht.
Përmes një deklarate, PTI-ja tha se rasti kundër Khanit dhe bashkëshortes së saj “ka mungesë të një baze të fortë dhe është i destinuar që të dështojë”.
Disa nga mbështetësit e Khanit u mblodhën jashtë burgut Adaila në Ravalpindi, brohoritën slogane kundër Qeverisë dhe kërkuan lirimin e ish-kryeministrit.
Më herët, ish-kryeministri është dënuar për akuza për korrupsion, zbulim të sekreteve shtetërore dhe shkelje të ligjeve të martesës dhe në tri vendime të ndara, ai është dënuar me dhjetë, 14 dhe shtatë vjet, respektivisht.
Sipas ligjit në Pakistan, ai duhet t’i vuajë të gjitha dënimet, që do të thotë kohëzgjatja e burgimit do të jetë më e gjatë./ REL
