Të afërm të 65-vjeçarit Hasan Mira, që vrau veten ditën e djeshme duke u hedhur nga kati i katërt i Senatoriumit, thonë se ditët e fundit ai kishte qenë në gjendje të rënduar psikologjike.
Në një prononcim për ABC News, Shkëlqim Topollai i afërmi i viktimës, tha se ai ishte zhvendosur në një dhomë ku ka qenë vetëm pasi kishte shfaqur shenja agresiviteti dhe paqëndrueshmërie.
“Hasani kishte rreth katër ditë që vuante. Pas dy ditësh ishte rënduar situata e tij dhe vendosëm ta sjellim në spital.
Nga të dhënat që kemi ai është acaruar edhe ka qenë i çekuilibruar dhe i nerviozuar dhe nuk ka dashur të mbajë oksigjenin dhe ka qenë shumë i acaruar. E kanë dërguar në dhomë vetëm pasi ka shfaqur shenja dhune dhe agresiviteti, paqëndrueshmërie.”
Ai pranoi se shkaqet e rëndimit të gjendjes psikologjike nuk kanë qenë nga kushtet spitalore dhe se ka folur me të vëllanë kur ka qenë i shtruar në spital.
“Nuk besoj se është çështje spitalore, por mbase nga paniku. Nuk e di a ka pasur telefon. Ka folur me të vëllain kur ka qenë i shtruar në spital. Nuk ka qenë i qetë fare.”, tha ai.
Por këto probleme, 65-vjeçari nuk i kishte shfaqur para se të shtrohej në spital, sipas të afërmit.
“Në kohën kur nuk ka qenë në spital ka qenë i qetë. Nuk vuante nga depresioni. Nuk është kuruar asnjëherë.”, u shpreh Topollai. /Opinion.al
